پاکستان و افغانستان کے مابین سرحدی راستہ بدستور بند، تجارتی سرگرمیاں بری طرح متاثر
پاکستان و افغانستان کے مابین بارڈر پر فائرنگ کا سلسلہ تھم گیا تاہم سرحدی راستہ بدستور بند ہے اور دوطرفہ تجارت اور پیدل آمدورفت معطل ہے۔
سحر نیوز/ عالم اسلام: پاکستان اور افغانستان کے میں سرحدی کشیدگی کے باعث طورخم تجارتی گزرگاہ آج پندرہویں روز بھی بند ہے۔ سیکیورٹی ذرائع کے مطابق گزشتہ دو روز سے فائرنگ کا سلسلہ تھم چکا ہے، تاہم سرحدی راستہ بدستور بند ہے، جس کے باعث پاک افغان دوطرفہ تجارت اور پیدل آمدورفت معطل ہے۔
پاکستان کی سیکیورٹی ذرائع کے مطابق جھڑپوں میں مجموعی طور پر 8 ایف سی اہلکار زخمی ہوئے جبکہ افغان فورسز کے 3 اہلکار ہلاک ہو گئے۔
امیگریشن حکام کا کہنا ہے کہ طورخم بارڈر کے ذریعے روزانہ تقریباً 10 ہزار افراد افغانستان آمدورفت کرتے ہیں، تاہم کشیدگی کے باعث یہ سلسلہ معطل ہے۔
سیکیورٹی ذرائع کے مطابق 14 روز قبل افغان فورسز سرحد کے متنازعہ علاقے میں تعمیرات کر رہی تھیں، جس پر پاکستان اور افغان فورسز کے درمیان کشیدگی پیدا ہوئی۔ اسی تنازعے کے باعث ایف سی حکام نے طورخم تجارتی گزرگاہ کو ہر قسم کی آمدورفت کے لیے بند کر دیا ہے۔
