ترکیہ کے وزیر خارجہ سے حماس کے رہنماؤں سے ملاقات
ترکیہ کے وزیرخارجہ نے حماس کے اعلی رہنماوں سے ملاقات کے دوران فلسطینی عوام کے حقوق کی حمایت جاری رکھنے اور غزہ کے لئے انسانی امداد بڑھانے کا اعلان کیا۔
سحرنیوز/عالم اسلام: تفصیلات کے مطابق، ترکیہ کے وزیر خارجہ حاکان فیدان نے انقرہ میں حماس کے ایک اعلی سطحی وفد سے ملاقات کی جس کی قیادت خلیل الحیہ کر رہے تھے۔ فیدان اور حماس کے رہنماؤں کی ملاقات میں غزہ کی موجودہ صورتحال کا جائزہ لیا گیا اور امن منصوبے کے دوسرے مرحلے پر تبادلہ خیال کیا گیا۔ اس موقع پر حاکان فیدان نے واضح کیا کہ ترکیہ ہر سطح پر فلسطینی عوام کے حقوق کی بھرپور حمایت جاری رکھے گا اور غزہ میں رہائش کی فراہمی اور انسانی امداد کے اقدامات کو مزید وسعت دے گا۔
حماس کے وفد نے ملاقات کے دوران کہا کہ تنظیم جنگ بندی معاہدے کی پابندی کر رہی ہے، تاہم اسرائیل کی جانب سے غزہ پر مسلسل حملے امن منصوبے کے دوسرے مرحلے میں پیش رفت کی راہ میں رکاوٹ بن رہے ہیں۔ حماس کے نمائندوں نے بتایا کہ امدادی سامان لے جانے والے صرف ساٹھ فیصد ٹرکوں کو غزہ میں داخلے کی اجازت ملی ہے، جو بنیادی ضروریات پوری کرنے کے لئے ناکافی ہے۔
ہمیں فالو کریں:
Follow us: Facebook, X, instagram, tiktok whatsapp channel
گفتگو کے دوران حماس کے وفد نے غزہ میں ادویات، تعمیراتی سامان، ایندھن اور دیگر ضروری اشیاء کی شدید کمی کی طرف توجہ دلائی اور خبردار کیا کہ یہ صورتحال بحران کو مزید سنگین بنا رہی ہے۔ ملاقات میں فریقین نے فلسطینی دھڑوں کے درمیان ہونے والے معاہدے اور مغربی کنارے کی صورتحال پر بھی بات چیت کی۔
