میں اب بھی صدر ٹرمپ کو ’فاشسٹ‘ اور ’آمر‘ سمجھتا ہوں: ظہران ممدانی کا دو ٹوک جواب
ڈونلڈ ٹرمپ کے ساتھ وائٹ ہاؤس میں ہونے والی ملاقات کے باوجود نیویارک کے نو منتخب میئر ظہران ممدانی اپنے سابقہ بیانات پر پوری طرح سے ڈٹے ہوئے ہیں۔
سحرنیوز/دنیا: امریکی ٹی وی چینل این بی سی کے پروگرام ’مِیٹ دی پریس‘ میں گفتگو کرتے ہوئے نیویارک کے نو منتخب میئر ظہران ممدانی نے کہا کہ انتخابی مہم کے دوران صدر ٹرمپ سے متعلق دیے گئے ان کے سخت بیانات آج بھی ان کے مؤقف کی بھرپور عکاسی کرتے ہیں اور وہ اب بھی صدر ٹرمپ کو ’فاشسٹ‘ اور ’آمر‘ سمجھتے ہیں۔
اس تازہ ٹی وی گفتگو میں ظہران ممدانی کا کہنا تھا کہ اختلافات کو چھپانے کے بجائے یہ ضروری ہے کہ عوامی مفاد کے لیے مل کر کام کیا جائے کیونکہ ان کا مقصد سیاسی نکتہ چینی نہیں بلکہ نیویارک کے عوام کے مسائل کو حل کرنا ہے۔
ظہران ممدانی نے بتایا کہ ملاقات میں اُنہوں نے اور ٹرمپ نے نیویارک شہر میں بڑھتی ہوئی مہنگائی، رہائش کے بحران اور دیگر معاشی مسائل پر بات کی کیوں کہ انتخابی مہم کے دوران ٹرمپ کے حامی ووٹروں نے بھی سب سے زیادہ مہنگائی پر تشویش ظاہر کی تھی اور یہی ان کی ترجیح بھی ہے۔
ظہران ممدانی نے کہا کہ وہ ٹرمپ انتظامیہ کے ساتھ ایک عملی اور مثبت کاموں پر مبنی تعلق چاہتے ہیں تاکہ ایسے مسائل حل کیے جا سکیں جو نیویارک کے شہریوں کی روزمرہ زندگی کو متاثر کرتے ہیں۔
واضح رہے کہ امریکی صدر ٹرمپ اور ظہران ممدانی کے درمیان واشنگٹن میں ہونے والی حالیہ ملاقات کے دوران ایک موقع پر ٹرمپ نے مذاق میں ممدانی سے ’فاشسٹ‘ کہنے والے تبصرے پر بھی بات چھیڑی تھی جس پر دونوں رہنما ہنس پڑے تھے۔
حالیہ انٹرویو کے دوران ظہران ممدانی نے واضح کیا کہ ان کا مؤقف بدلا نہیں ہے البتہ کام عوامی ضرورت کے مطابق آگے بڑھایا جائے گا۔
قابل ذکر ہے کہ انتخابی مہم کے دوران ظہران ممدانی اور ڈونلڈ ٹرمپ کے درمیان سخت لفظی جنگ کا مشاہدہ کیا گیا تھا، ٹرمپ نے متعدد بار ممدانی کو ’کمیونسٹ ذہنیت کا حامل‘ قرار دیا تھا اور وفاقی فنڈ روکنے کی دھمکیاں بھی دی تھیں۔
ہمیں فالو کریں:
Follow us: Facebook, X, instagram, tiktok
