دنیا کی چوتھی سب سے بڑی معیشت ہندوستان کے نام
ہندوستانی میڈیا نے دعوی کیا ہے کہ ہندوستان دنیا کی چوتھی سب سے بڑی معیشت بن گیا ہے۔
سحرنیوز/ہندوستان: ہندوستانی میڈیا کی رپورٹ کے مطابق، نیتی آیوگ کے سی ای او بی وی آر سبرامنیم نے میڈیا کو بتایا کہ ہندوستان4 ٹریلین ڈالر کی معیشت والا ملک بن گیا ہے۔ جاپان کو پیچھے چھوڑ کر ہندوستان دنیا کی چوتھ بڑی اکنامی بن گيا ہے۔ بین الاقوامی مالیاتی فنڈ یعنی (IMF) آئی ایم ایف کے اعداد وشمار کاحوالہ دیتے ہوئے سبرامنیم نے کہا کہ آج کی تاریخ میں ہندوستان کی معیشت جاپان سے بڑی ہے۔
نیتی آیوگ کے سی ای او نے کہا کہ صرف امریکہ،چین اورجرمنی ہی ہندوستان سے بڑی معیشتیں ہیں۔انھوں نے مزید کہا کہ،اگر ہم اپنے منصوبے پرعمل کرتے رہے توڈھائی تین برسوں میں ہم تیسری بڑی معیشت بن سکتے ہیں۔ نیتی آیوگ کے سی ای او بی وی آر سبرامنیم کے مطابق عالمی اوراقتصادی ماحول ہندوستان کے موافق ہے۔
آئی فون بنانے والی کمپنی ایپل کو لے کرامریکی صدر ڈونلڈ ٹرمپ کے حالیہ بیان پر ایک سوال کا جواب دیتے ہوئے سبرامنیم نے کہا کہ ٹریف کیا ہوگی، یہ غیریقینی ہے لیکن جس طرح سے چیزیں بدل رہی ہیں ہم مینوفیکچرنگ کے لیے سستی جگہ ہوں گے۔ امریکی صدرڈونلڈ ٹرمپ نے کہا تھا کہ اُمید ہے کہ امریکہ میں فروخت ہونےوالے آئی فون کی مینوفیکچرنگ امریکہ میں ہی ہوگی۔ مالی سال2025کی چوتھی سہ ماہی میں ملک کی مجموعی گھریلو پیداوار6.8فیصد رہنے کا امکان ہے۔اس کا مطلب یہ ہے کہ ملک کی معیشت میں اضافہ ہوا ہے۔ زراعت،ہوٹل،ٹرانسپورٹ اورکنسٹرکشن جیسے شعبوں کا مظاہرہ بہتر ہے۔
نیتی آیوگ کے سی ای او نے کہا کہ ایسٹ مونی ٹائزیشن(Asset Monetisation) مرتب کیا جارہا ہے۔ اس کا دوسرا دور جاری ہے اوراس کا اعلان اگست میں کیا جائیگا۔ واضح رہے کہ آئی ایم ایف کی ورلڈ اکنامک آؤٹ لُک کے مطابق ہندوستان دنیا کی تیزی سے فروغ پاتی معیشت ہے۔ اپریل2025 کی رپورٹ کے مطابق ہندوستان کی معیشت کی شرح نمو سال 2025 میں6.2 جبکہ 2026میں ترقی کی رفتار6.3 فیصد رہے گی۔ جبکہ عالمی مالیاتی فنڈ کی رپورٹ کے مطابق اس دوران ، عالمی عالمی معیشت کی شرح نمو2025 میں 2.8 جبکہ 2026 میں شرح نمو3 فیصد رہنے کا امکان ہے۔
