SAHAR

ایرانی زمینی فوج کے اعلی کمانڈر جنرل کیومرث حیدری نے عنقریب جدید ہتھیاروں کی رونمائی کا اعلان کرتے ہوئے کہا ہے کہ دشمن کسی قسم کی غلطی کرے گا تو اسے بھرپور اور منہ توڑ جواب دیا جائے گا۔

مہر خبررساں ایجنسی کی رپورٹ کے مطابق، ایرانی زمینی فوج کے اعلی کمانڈر بریگیڈیئر جنرل کیومرث حیدری نے کہا ہے کہ مستقبل قریب میں کی جنگوں کے لیے جدید اور مؤثر اسلحہ کی رونمائی کی جائے گی۔ انہوں نے کہا کہ ایرانی مسلح افواج جدید ترین ٹیکنالوجی سے لیس ہے۔ دشمن کسی قسم کی جارحیت کرے تو منہ توڑ جواب دیا جائے گا۔ آج ہماری سب سے بڑی طاقت صرف افرادی قوت نہیں بلکہ ولی فقیہ کی مکمل اطاعت ہے۔

جنرل کیومرث حیدری نے کہا کہ مسلح افواج ملکی ساختہ اسلحہ اور ہتھیاروں پر اعتماد کرتے ہوئے ملکی سرحدوں کی حفاظت کو یقینی بنارہی ہیں۔ ایرانی فوج کے پاس آج ایسے جدید اور مخصوص ہتھیار موجود ہیں جو دشمن کے ٹھکانوں کو دقیق اور درست نشانہ بناسکتے ہیں۔ دشمن کی طرف سے کسی قسم کی غلطی سرزد ہونے کی صورت میں مسلح افواج کے چاق و چوبند جوان منہ توڑ جواب دیں گے۔ انہوں نے مزید کہا کہ ایرانی زمینی فوج کے جوان تعلیم یافتہ اور تربیت یافتہ ہیں اور ان کے ساتھ وسیع تعداد میں عام سپاہی بھی موجود ہیں جو ملک اور قوم کی خدمت انجام دے رہے ہیں۔

جنرل حیدری کا کہنا تھا کہ زمینی فوج میں 23 شعبے کام کر رہے ہیں، اور ہر شعبے کے لیے مخصوص اسلحہ موجود ہے تاکہ ہر قسم کے خطرات کا مقابلہ کیا جاسکے۔ انہوں نے کہا کہ ہمارے پاس ایسے اسمارٹ اور نقطہ زن میزائل موجود ہیں جو زمینی افواج کی ضروریات کے مطابق تیار کیے گئے ہیں۔

سرحدی سیکورٹی کے حوالے سے جنرل حیدری نے کہا کہ مشرقی سرحدوں، خاص طور پر افغانستان کے ساتھ متصل علاقوں میں ایک جدید سیکورٹی منصوبہ شروع کیا گیا ہے۔ یہ منصوبہ صرف ایک چار میٹر اونچی دیوار نہیں بلکہ جدید ترین ٹیکنالوجی سے لیس مکمل نظام ہے۔ اس چار سالہ منصوبے کا ایک حصہ مکمل ہو چکا ہے اور باقی تین سال میں پایہ تکمیل تک پہنچایا جائے گا۔