ایرانی وزیرخارجہ کی اپنے مصری ہم منصب کے ساتھ مشترکہ پریس کانفرنس
ایران کے وزیر خارجہ نے اپنے مصری ہم منصب کے ساتھ ایک مشترکہ پریس کانفرنس میں کہا ہے کہ دونوں ملکوں کے درمیان تعلقات کی توسیع کے دروازے پہلے کہیں زیادہ کھلے ہوئے ہیں ۔ ہم نے اس بات سے اتفاق کیا ہے کہ مذاکرات کا سلسلہ اور صلاح و مشورے کا عمل بھی جاری رہے گا۔
سحرنیوز/ایران :ایران کے وزیر خارجہ سید عباس عراقچی نے قاہرہ میں اپنے مصری ہم منصب بدر عبدالعاطفی کے ساتھ ایک مشترکہ پریس کانفرنس میں اس بات کی طرف اشارہ کرتے ہوئے کہ ایران اور مصر ، علاقے کے دو بڑے ممالک ہیں اور بنیادی طور پر طویل تاریخ و تمدن کا ماضی رکھتے ہیں ،کہا ہے کہ دونوں ممالک علاقے میں امن و استحکام کے قیام میں کلیدی کردار ادا کرتے رہے ہیں۔ انھوں نے کہا کہ دونوں ممالک دو طرفہ تعلقات اور سیاسی صلاح و مشورے کے فروغ میں دلچسپی کا اظہار کرتے رہے ہیں اور دونوں ممالک تعلقات و تعاون کی توسیع کے عزم کا اظہار کرتے رہے ہیں۔ ایران کے وزیرخارجہ نے اسی طرح اپنے مصری ہم منصب کے ساتھ ملاقات و مذاکرات میں علاقائی مسائل اور خاصطور سے مسئلہ فلسطین پر ہونے والے تبادلہ خیال کا ذکر کرتے ہوئے صیہونی جرائم کا مقابلہ کئے جانے کی ضرورت پر زور اور فلسطینیوں کی حمایت پر تاکید کی۔
ایران کے وزیر خارجہ سید عباس عراقچی نےغزہ میں فائر بندی کے سمجھوتے کے لئے مصر اور قطر کی کوششوں کی قدردانی کی اور کہا کہ اسلامی جمہوریہ ایران غزہ میں فوری طور پر فائر بندی کا خواہاں ہے ۔ ایران کے وزیر خارجہ نے مصر کا دورہ مکمل کرنے کے بعد لبنان کے دورے پر بیروت کے رفیق حریری ایرپورٹ پہنچ کر کہا کہ لبنان کے قومی اقتدار اعلی کا احترام اور ارضی سالمیت کا تحفظ نہ صرف ایران بلکہ پورے علاقے کے لئے خاص اہمت رکھتا ہے سید عباس عراقچی ،مصر کا دورہ مکمل کرکے آج بیروت پہنچے اور بیروت ہوائی اڈے پر ایک پریس کانفرنس میں نامہ نگاروں سے ہونے والی گفتگو میں اپنے اس دورے کا مقصد لبنانی حکام سے ملاقات و گفتگو قرار دیا اور کہا کہ ہماری خارجہ پالیسی میں پڑوسی، مغربی ایشیا اور علاقے میں دوست ممالک کے ساتھ تعلقات کے فروغ کو خاص اہمیت حاصل ہے اور ان کا دورہ لبنان ،علاقائی دورے کا ایک حصہ ہے جو قاہرہ سے شروع ہوا جہاں انھوں نے مصری حکام سے اہم ملاقاتیں کیں اور اب لبنانی حکام سے ملاقاتیں ہوں گی ۔ایران کے وزیرخارجہ نے اس بات کا ذکر کرتے ہوئے کہ ایران اور لبنان کے درمیان باہمی احترام کی بنیاد پر دوستانہ دیرینہ تعلقات قائم رہے ہیں کہا کہ ہم دونوں ملکوں کے درمیان باہمی احترام و باہمی مفادات کی بنیاد پر ان دوستانہ تعلقات کو جاری رکھنے کا عزم رکھتے ہیں۔
