صیہونی فوج نے آج صبح غرب اردن اور غزہ میں وسیع پیمانے پر فوجی کارروائی کا آغازکیا ہے-
اسرائیلی فوج نے مغربی کنارے اور غزہ کی پٹی کے متعدد علاقوں میں بیک وقت کئی فوجی آپریشن شروع کر دیئے ہيں۔
سحرنیوز/عالم اسلام: مرکزاطلاعات فلسطین کے مطابق اسرائیلی فوج نے مغربی کنارے اور غزہ کی پٹی کے متعدد علاقوں میں بیک وقت کئی فوجی آپریشن شروع کیے، جن میں فلسطینی نوجوانوں کی گرفتاریاں، چھاپے، مکانات کی مسماری اور سڑکوں پر جھڑپیں شامل ہیں۔
اطلاعات کے مطابق غزہ کی پٹی میں صیہونی فوج نے غزہ شہر کے مشرقی علاقوں میں رہائشی مکانات کو مسمار کرنے کے لیے بھاری ہتھیاروں کا استعمال کیا۔
فلسطین الیوم کے نامہ نگار نے اطلاع دی ہے کہ یہ کارروائی غزہ کی پٹی کے وسط میں البریج کیمپ اور المغازی کیمپ کے مشرقی علاقوں پر توپ خانے کے گولوں سے کی گئی۔
مغربی کنارے میں بھی صیہونی فوج نے بیک وقت مختلف شہروں اور دیہی علاقوں پر چھاپے مارے جن میں طوباس، عقابا، الخلیل، صوریف، طفوح، دیر ابو مشعل اور جفنا شامل ہیں۔
رپورٹ کے مطابق ان چھاپوں کے دوران صوریف شہر میں الحبلہ کے علاقے میں شہید محمد الھور کے گھر کی تلاشی لی گئی اور جفنا میں "مجد معتصم قطامی" نامی نوجوان کو اسرائیلی فوج نے گرفتار کر لیا۔
اس کے علاوہ طولکرم کے مشرق میں واقع عنبتا ٹاؤن میں بھی فلسطینی نوجوانوں اور صیہونی قابض فوج کے درمیان جھڑپوں کی اطلاع ہے۔
صیہونی فوج کی یہ کارروائیاں ایک ایسے وقت میں انجام پا رہی ہیں جب حالیہ ہفتوں کے دوران مقبوضہ فلسطینی علاقوں میں کشیدگی میں تیزی سے اضافہ ہوا ہے اور پورے خطے میں اس تنازعے کے پھیلنے کے خدشات کا اظہار کیا جا رہا ہے۔
ڈھاکہ میں پاکستان اور بنگلادیش مشترکہ اقتصادی کمیشن کے اجلاس میں دونوں ملکوں کے درمیان وسیع تر تعاون پر اتفاق کیا گیا ہے۔
