SAHAR

اسلامی جمہوریہ ایران اور پاکستان کے وزرائے خارجہ نے کسی بھی اشتعال انگیز اقدام اور کشیدگی سے اجتناب پر تاکید کی ہے

سحرنیوز/پاکستان:  پاکستان کے نائب وزیراعظم اور وزیرخارجہ اسحاق ڈار نے علاقے میں کشیدگي کم کرنے کے لئے ایران کی کوششوں کو سراہا ۔ پاکستانی نائب وزیر اعظم و وزیر خارجہ نے جمعہ کو ایرانی وزیر خارجہ سید عباس عراقچی سے ٹیلی فون پر گفتگو کی اور پہلگام واقعے کے بعد کی صورت حال کے بارے میں تبادلہ خیال کیا۔ پاکستانی دفتر خارجہ کے ترجمان کی جانب سے جاری بیان کے مطابق نائب وزیر اعظم اور وزیر خارجہ اسحاق ڈار نے پہلگام کے حالیہ واقعے کے بعد پاکستان اور ہندوستان کے تعلقات اور دونوں ملکوں کے درمیان موجودہ صورتحال سے ایرانی وزیر خارجہ کو آگاہ کیا اور ہندوستان کے الزامات کو سختی سے مسترد کیا۔ پاکستانی وزيرخارجہ نے ہندوستان کی جانب سے کسی بھی ممکنہ اشتعال انگیز اقدام سے خبردار کیا اور خطے میں کشیدگی کم کرنے کی ایرانی کوششوں کو سراہا۔ پاکستانی نائب وزیر اعظم اور وزیر خارجہ نے عمان کے دارالحکومت مسقط میں کل منعقد ہونے والے ایران امریکہ مذاکرات کے لیے نیک تمناؤں کا اظہار بھی کیا۔

درایں اثنا ایرانی وزيرخارجہ نے کہا ہے کہ ایران ، ہندوستان اور پاکستان کے درمیان ثالثی کے لئے تیار ہے۔ وزیرخارجہ سید عباس عراقچی نے سوشل نیٹ ورک ایکس پر اپنے پیغام میں لکھا کہ ایران ، پاکستان اور ہندوستان کے درمیان ثالثی کے لئے تیار ہے۔ انہوں نے کہا کہ ہندوستان اور پاکستان ایران کے بھائی اور پڑوسی ہیں اور صدیوں پرانے ثقافتی اور تہذیبی رشتوں میں جڑے ہوئے ہیں۔ ہم دوسرے پڑوسیوں کی طرح ان کو اپنی پہلی ترجیح سمجھتے ہیں۔ انھوں نے کہا کہ تہران اس مشکل وقت میں فریقین کے درمیان افہام و تفہیم کے لیے اسلام آباد اور نئی دہلی میں ہر ممکن کوشش کو بروئے کار لانے کے لیے تیار ہے۔