روس امریکہ کے سامنے کبھی گھٹنے نہیں ٹیکے گا: روسی صدر پوتین
روسی صدر ولادیمیر پوتین نے امریکہ کی نئی پابندیوں پر سخت ردِعمل ظاہر کرتے ہوئے کہا ہے کہ روس امریکہ کے سامنےکبھی گھٹنے نہیں ٹیکے گا۔
سحرنیوز/دنیا: ذرائع ابلاغ کی رپورٹ کے مطابق روسی صدر ولادیمیر پوتین نے کہا کہ امریکہ کے غیر دوستانہ اقدامات روس اور امریکہ کے تعلقات کو مزید کمزور کردیں گے۔ ولادیمیر پوتین نے کہا کہ کوئی خوددار اور عزت دار ملک دباؤ میں آ کر فیصلے نہیں کرتا۔
ان کا کہنا تھا کہ امریکہ کی نئی پابندیاں روسی معیشت پر کچھ اثر ڈال سکتی ہیں لیکن روس اپنی پالیسیوں پر قائم رہے گا اور بیرونی دباؤ کے باوجود خودمختاری سے فیصلے کرے گا۔
واضح رہے کہ امریکہ نے گزشتہ روز روس کی دو بڑی تیل کمپنیوں روزنیفٹ اور لک آئل پر نئی پابندیاں عائد کی ہیں تاکہ کریملن کو یوکرین جنگ ختم کرنے پر مجبور کیا جا سکے۔ امریکی حکام کا کہنا ہے کہ ان اقدامات سے روس پر معاشی دباؤ بڑھے گا اور صدر پوتین کو مذاکرات کی میز پر لانے میں مدد ملے گی۔
