فلسطین کے مستقبل کا فیصلہ کرنے کا حق امریکہ یا کسی اور استعماری طاقت کو نہیں: قالیباف
ایران کی پارلیمنٹ کے اسپیکر قالیباف نے کہا ہے کہ فلسطین کے مستقبل کا فیصلہ کرنے کا حق امریکہ یا کسی اور استعماری طاقت کو نہیں بلکہ صرف فلسطینی عوام کو حاصل ہے۔
سحرنیوز/ایران: ایرانی پارلیمنٹ کے اسپیکر محمد باقر قالیباف نے آذربائیجان کے دارالحکومت باکو میں منعقدہ ایشیائی پارلیمانی اسمبلی کے پندرہویں اجلاس کے دوران کہا کہ استقامتی بلاک نے صیہونی حکومت کو اسٹریٹجک شکست سے دوچار کر دیا ہے۔ اس شکست کی تلافی کے لیے اسرائیل اور امریکہ خطے میں نئی سیاسی سازشیں تیار کررہے ہیں۔انہوں نے کہا کہ فلسطین کے مستقبل کا فیصلہ نہ امریکہ کرے گا اور نہ ہی کوئی اور استعماری طاقت، بلکہ اس کا حق صرف اور صرف فلسطینی عوام کو حاصل ہے۔
ایرانی پارلیمنٹ کے اسپیکر نے امریکی صدر کے حالیہ بیانات کو بےبنیاد قرار دیتے ہوئے کہا کہ غزہ پر کنٹرول حاصل کرنے اور فلسطینی عوام کی جبری ہجرت کے حوالے سے امریکی صدر کے خیالات استعماری ذہنیت کا تسلسل اور فلسطینی عوام کے حقوق کی سنگین خلاف ورزی کی واضح مثال ہیں۔ انھوں نے کہا کہ یہ منصوبہ درحقیقت ایک قسم کا نسلی امتیاز ہے جو فلسطینی عوام کی قومی شناخت کو کمزور کرنے اور ان کی مزاحمت کو دبانے کے لیے ترتیب دیا گیا ہے اور یہ غیر انسانی منصوبہ خطے کی پہلے سے نازک سلامتی کو مزید بحرانوں اور چیلنجز سے دوچار کر سکتا ہے۔
محمد باقر قالیباف نے زور دیا کہ اسلامی جمہوریہ ایران ہر اس مسلط کردہ منصوبے کی سختی سے مخالفت کرتا ہے جو فلسطینی عوام کی مرضی کے خلاف ہو۔ انہوں نے ایشیائی پارلیمانی اسمبلی کے رکن پارلیمانوں سے مطالبہ کیا کہ وہ اس نئی سازش کے مقابلے میں عملی طور پر فلسطینی عوام کے جائز حقوق کا دفاع کریں۔
