دہلی سے ہی ایرانی وزیر خارجہ نے اپنے پاکستانی ہم منصب کو ملایا فون، کشیدگی کم کرنے پر تاکید
ایرانی وزیر خارجہ نے پاکستانی ہم منصب سے ٹیلیفونی گفتگو کے دوران پاکستان اور ہندوستان کے درمیان جاری کشیدگی کم کرنے پر تاکید کی۔
سحرنیوز/ایران: مہر خبررساں ایجنسی کی رپورٹ کے مطابق، ایرانی وزیر خارجہ سید عباس عراقچی نے پاکستان کے نائب وزیر اعظم اور وزیر خارجہ محمد اسحاق ڈار سے ٹیلیفون پر رابطہ کیا۔ دونوں رہنماؤں نے جنوبی ایشیا میں ہندوستان اور پاکستان کے درمیان بڑھتی ہوئی کشیدگی کے تناظر میں خطے کی تازہ ترین سیکیورٹی صورتحال پر تبادلہ خیال کیا۔
عراقچی نے ہندوستانی حکام سے اپنی ملاقاتوں کا حوالہ دیتے ہوئے دونوں ملکوں کی جانب سے کشیدگی کو بڑھنے سے روکنے اور حالات کو معمول پر لانے کی کوششوں کی اہمیت پر زور دیا۔
دوسری جانب پاکستانی وزیر خارجہ نے خطے کی موجودہ صورت حال پر روشنی ڈالتے ہوئے پاکستان کے مؤقف سے آگاہ کیا اور واضح کیا کہ پاکستان کشیدگی کو ہوا دینے کا خواہاں نہیں۔
