دہشتگرد اسرائیلی فوجی ٹھکانوں پر حزب اللہ کا تابڑ توڑ حملہ، صیہونی فوج نے نقصان کا کیا اعتراف
حزب اللہ لبنان نے صیہونی فوج کے ٹھکانوں پر حملے جاری رکھتے ہوئے متعدد ٹھکانوں اورمراکز کو نشانہ بنایا ہے۔
سحر نیوز/ عالم اسلام: حزب اللہ لبنان نے کہا ہے کہ اس کے مجاہدین نےالخیام ٹاؤن میں، صہیونی فوجیوں کے ٹھکانوں پر متعدد میزائل داغے ہیں- حزب اللہ کے مجاہدین نے آج کفاریوف صیہونی بستی کے شمال میں واقع ھضبۃ العجل فوجی اڈے کو بھی نشانہ بنایا ہے۔
دوسری جانب عبری ذرائع نے مقبوضہ فلسطین کے شمالی علاقے نہاریا پر حزب اللہ کے ڈرون طیارے کی پرواز کی ویڈیو شائع کی ہے۔صہیونی میڈیا نے الجلیل میں واقع علاقوں المطلہ ، کریات شمعونہ ، کفار یوال اور کفار گلعادی صیہونی بستیوں میں خطرے کے سائرن بجنے کی خبر دی ہے-اسی دوران اسرائیلی فوج نے اپنے ایک فوجی کی ہلاکت اور ایک ریزرو فوجی کرنل کے زخمی ہونے کا اعتراف کیا ہے۔
صیہونی فوج نے اعتراف کیا ہے کہ گولانی بریگیڈ کی تیرہویں بٹالین میں شامل اس کا ایک فوجی جنوبی لبنان میں حزب اللہ کے مجاہدین کے ساتھ جھڑپ میں مارا گیا ہے۔ اسرائیلی فوج نے مزید کہا کہ یہ فوجی شمع ٹاؤن میں حزب اللہ کے مجاہدین کے ساتھ براہ راست لڑائی کے دوران مارا گیا ہے۔ گزشتہ روز بھی جنوبی لبنان کی ایک عمارت میں صیہونی فوجیوں پر حزب اللہ کے حملے کے نتیجے میں صیہونی حکومت کے گولانی اسپیشل بریگیڈ کے چار فوجی ہلاک اور قابض فوج کے متعدد اہلکار زخمی ہوگئے تھے۔
