وینزویلا میں بڑھتی کشیدگی علاقائی اور عالمی امن و سلامتی کے لیے خطرات کا سبب: سلامتی کونسل کے ہنگامی اجلاس میں پاکستانی مندوب

Jan ۰۶, ۲۰۲۶ ۱۴:۵۲ Asia/Tehran

وینزویلا کے بارے میں سلامتی کونسل کے ہنگامی اجلاس میں پاکستان نے خبردار کیا ہے کہ وینزویلا میں بڑھتی ہوئی کشیدگی علاقائی اور عالمی امن و سلامتی کے لیے خطرات پیدا کر رہی ہے۔

سحرنیوز/پاکستان: پیر کو وینزویلا کی تازہ صورت حال پر غور کرنے کے لیے اقوام متحدہ کی سلامتی کونسل کا ہنگامی اجلاس منعقد ہوا جس میں پاکستان نے وینزویلا میں ہونے والے تغیرات پر شدید تشویش کا اظہار کرتے ہوئے خبردار کیا کہ وہاں بڑھتی ہوئی کشیدگی علاقائی اور عالمی امن و سلامتی کے لیے خطرات پیدا کر رہی ہے۔

یہ سلامتی کونسل کا 2026 کا پہلا اجلاس بھی تھا، جس کی صدارت اس وقت صومالیہ کے پاس ہے۔

پاکستان کے قائم مقام مستقل مندوب سفیر عثمان جدون نے سلامتی کونسل کے ہنگامی اجلاس سے اپنے خطاب میں کہا کہ ایسے وقت میں جب دنیا پہلے ہی متعدد بحرانوں سے دوچار ہے، خطے میں عدم استحکام علاقائی اور عالمی امن و سلامتی کے لیے نیک شگون نہیں۔

ان کا کہنا تھا کہ اقوام متحدہ کا چارٹر ریاستوں کو کسی بھی ملک کی علاقائی سالمیت یا سیاسی خود مختاری کے خلاف طاقت کے استعمال یا دھمکی سے باز رہنے، خودمختار مساوات، اندرونی معاملات میں عدم مداخلت اور تنازعات کے پُرامن حل کا پابند بناتا ہے۔

ہمیں فالو کریں:

عثمان جدون نے کہا کہ یکطرفہ فوجی کارروائی ان مقدس اصولوں اور ریاستی استثنیٰ کے نظریہ کے بھی منافی ہے اور ایسی کارروائیاں خطرناک مثالیں قائم کرتی ہیں جو عالمی قانونی ڈھانچے کی بنیادوں کو کمزور کر سکتی ہیں اور یہ کہ اس طرح کے اقدامات انتشار اور افراتفری کو ہوا دیتے ہیں۔

پاکستانی مندوب نے سلامتی کونسل کے ہنگامی اجلاس سے خطاب میں کہا کہ اس نازک مرحلے پر آگے بڑھنے کا راستہ مکالمہ اور سفارت کاری ہونا چاہیے اور سیاسی اختلافات کا پائیدار حل صرف پُرامن ذرائع سے وینزویلا کے عوام کی مرضی کے مکمل احترام کے ساتھ بیرونی مداخلت کے بغیر ہی ممکن ہیں۔

واضح رہے کہ امریکہ نے ہفتے کے روز وینزویلا میں اچانک فوجی کارروائی کی، جس کے دوران خصوصی دستوں نے رات کو چھاپے میں وینزویلا کے صدر نکولس مادورو اور ان کی اہلیہ سیلیا فلورس کو گرفتار کر لیا۔