امریکہ: واشنگٹن میں "ٹرمپ کو اب جانا ہوگا" کے نعروں کی گونج
امریکہ کے دارالحکومت واشنگٹن میں صدر ڈونلڈ ٹرمپ کے خلاف زبردست مظاہرے ہوئے ہیں۔ مظاہرین نے’ ٹرمپ کواب جاناہوگا‘ کے نعرے لگائے۔
سحرنیوز/دنیا: میڈیا رپورٹوں کے مطابق امریکہ کے دارالحکومت واشنگٹن ڈی سی میں صدر ڈونلڈ ٹرمپ کے خلاف مظاہروں کا نیا سلسلہ شروع ہوگیا ہے۔ ڈونلڈ ٹرمپ کی پالیسیوں کے خلاف عوام سڑکوں پر نکل آئے ہیں اور ٹرمپ مخالف نعرے لگا رہے ہیں۔
واشنگٹن ڈی سی میں مظاہرین نے "ٹرمپ کو جانا ہوگا" کے عنوان سے احتجاجی ریلی نکالی۔ مظاہرین نے کیپٹل ہِل تک مارچ کیا اور ٹرمپ کے خلاف زبردست نعرے بازی کی۔ مظاہرین نے کہا کہ ٹرمپ کے خلاف سول نافرمانی تحریک چلانے کی ضرورت ہے، جب تک ٹرمپ کو اقتدار سے ہٹایا نہیں جاتا وہ متحرک رہیں گے۔
اسوسی ایٹیڈ پریس، اے پی، نے اپنی رپورٹ میں بتایا کہ واشنگٹن ڈی سی میں ہونے والا مظاہرہ فاشزم کے خلاف منعقد ہوا تھا، جس کی منصوبہ بندی کئی ہفتے قبل صدر ڈونلڈ ٹرمپ کے انتخاب کے ایک سال مکمل ہونے کے موقع پر کی گئی تھی لیکن اس مظاہرے میں نئی جوش و حرارت اس وقت پیدا ہوئی جب منگل کی رات ملک بھر میں ہونے والے اہم انتخابات میں ڈیموکریٹ امیدواروں کی نمایاں کامیابیوں نے احتجاجی شرکا کو توانائی بخشی۔
اس دوران ہزاروں افراد نعرے لگاتے رہے کہ ٹرمپ کو اب جانا ہوگا۔ یہ منگل کے انتخابات کے بعد ہونے والا پہلا بڑا ٹرمپ مخالف مظاہرہ تھا۔ ان انتخابات میں ڈیموکریٹ امیدواروں نے پورے امریکہ میں شان دار کامیابیاں حاصل کیں، جن میں ورجینیا اور نیو جرسی کی گورنری، نیویارک شہر کی میئرشپ اور کیلی فورنیا میں انتخابی حلقہ بندیوں سے متعلق ایک ایسا ریفرینڈم بھی شامل تھا جو ڈیموکریٹک پارٹی کے حق میں تھا۔
ان کامیابیوں نے یہ ظاہر کیا کہ ملک کی سیاسی فضا کا رخ بدل رہا ہے، جوش سے بھرپور مظاہرین کا کہنا تھا کہ ان انتخابات کے نتائج اس بات کا ثبوت ہیں کہ ان کی جدوجہد اب سیاسی سطح پر کامیاب ہورہی ہے، وہ جدوجہد جس کا مقصد صدر کے اختیارات کے مبینہ ناجائز استعمال اور جمہوری اقدار کے زوال کے خلاف آواز بلند کرنا ہے۔
