امریکی صدر ٹرمپ کی نئی دھمکی، روس کے ساتھ اقتصادی رابطہ رکھنے والوں کو سنگین نتائج کا انتباہ
امریکی صدر ڈونلڈ ٹرمپ کی دھمکیوں کا سلسلہ جاری ہے اور اب انہوں نے روس کے ساتھ اقتصادی رابطہ رکھنے والے ممالک کو سنگین پابندیوں کا سامنا کرنے کا انتباہ دیا ہے۔
سحرنیوز/دنیا: میڈیا رپورٹوں کے مطابق امریکی صدر ڈونلڈ نے کہا ہے کہ جو بھی ممالک روس کے ساتھ کاروبار کررہے ہیں انہیں بہت سنگین سزا کاسامنا کرنا پڑے گا۔ پام بیچ انٹرنیشنل ایئرپورٹ پر ڈونلڈ ٹرمپ نے کہا کہ ریپبلکن قانون ساز ایسے قانون بنا رہے ہیں جن کے تحت اگر کوئی ملک ماسکو کے ساتھ اقتصادی تعلقات جاری رکھتا ہے تو اس پر پابندیاں عائد کردی جائیں گی۔
ٹرمپ کی یہ دھمکی روس کی تیل کمپنیوں لوکوئیل اور سرکاری کمپنی روزنیفٹ پر حال ہی میں سخت پابندیاں عائد کیے جانے کے بعد سامنے آئی ہے جو 21 نومبر سے نافذ ہونے والی ہیں۔
صدر ٹرمپ نے امریکی پابندیوں میں توسیع کرتے ہوئے روس کے ساتھ کسی بھی قسم کا کاروبار کرنے والے ممالک کو نیا انتباہ جاری کیا ہے۔
بتایا جاتا ہے کہ تازہ سختی روس کی جانب سے یوکرین میں جنگ کے خاتمے کے لئےمذاکرات سے انکار کے بعد سامنے آئی ہے۔ اطلاعات کے مطابق بڑھتے ہوئے دباؤ کے باوجود روسی صدر ولادیمیر پوتن اپنی بات پر اڑے ہوئے ہیں۔
