سری لنکا میں’دِتوا‘ طوفان کے نتیجے میں 123 افراد ہلاک، 130 لاپتہ
سری لنکا میں سمندری طوفان ’دِتوا‘ کے نتیجے میں سیلاب اور زمین دھنسنے کے واقعات میں 123 افراد ہلاک اور 130 افراد لاپتہ بتائے جا رہے ہیں۔
سحرنیوز/دنیا: میڈیا رپورٹوں کے مطابق سری لنکا میں سمندری ’دِتوا‘ طوفان کی وجہ سے مستقل بارش ہو رہی ہے اور اس کے نتیجے میں زمین دھنسنے کے واقعات سامنے آئے ہیں۔ ان واقعات کے نتیجے میں اب تک 123 افراد ہلاک ہوئے ہیں اور 600 سے زیادہ گھروں کو شدید نقصان پہنچا ہے۔
اطلاعات کے مطابق ’دِتوا‘ طوفان کے نتیجے میں بے گھر ہونے والے 44 ہزار افراد کو عارضی طور پر بنائے گئے کیمپوں میں منتقل کردیا گیا ہے۔
مشکل صورت حال کو پیش نظر رکھتے ہوئے حکومت نے جمعہ کے روز سبھی سرکاری دفاتر اور اسکولوں کو بند کردیا تھا۔
سری لنکا کی حکومت نے بین الاقوامی مدد کی اپیل کی ہے اور بیرونی ممالک میں رہنے والے سری لنکن شہریوں سے تقریباً 5 لاکھ متاثرہ افراد کی مدد کے لیے نقد عطیات دینے کی درخواست کی ہے۔
ہمیں فالو کریں:
Follow us: Facebook, X, instagram, tiktok
دریں اثنا سری لنکا کے ڈیزاسٹر مینجمنٹ سینٹر (ڈی ایم سی) کےڈائریکٹر میجر جنرل سمپتھ کوٹووے گوڈا نے کہا ہے کہ فوج، نیوی اور ایئر فورس کے ہزاروں اہلکاروں کی تعیناتی کے ساتھ ریلیف آپریشن جاری ہے۔
ڈی ایم سی کے ایک اہلکار نے بتایا کہ فائبر آپٹک کیبل کئی جگہوں پر ٹوٹ گئے ہیں اور موبائل فون کام نہیں کر رہے ہیں کیوں کہ بیس اسٹیشن پانی میں ڈوب گئے ہیں۔
