دباؤ کے تحت امریکہ کے ساتھ مذاکرات قبول نہیں، اس طرح کے مذاکرات کا نتیجہ ایران کی عظیم قوم کی توہین: اسپیکر قالیباف
ایران کے پارلیمانی سربراہ محمد باقرقالیباف نے کہا ہے کہ دباؤ کے تحت امریکہ کے ساتھ مذاکرات قبول نہیں کریں گے۔
سحر نیوز/ ایران: ایرانی پارلیمنٹ کے سربراہ محمدباقر قالیباف نے کہا ہے کہ پارلیمنٹ دیگر اداروں کے ساتھ مل کر ملک کی ترقی کے لیے کام کرے گی۔ گذشتہ روز اعلی حکام سے رہبر انقلاب اسلامی کے خطاب کا حوالہ دیتے ہوئے انہوں نے کہا کہ معاشی اور اقتصادی مسائل کو اولین ترجیح دینا ہوگا اور تمام اداروں کو عوام کی معیشت کی بہتری پر توجہ مرکوز کرنی چاہیے۔ کسی بھی معاملے کو اس اہم مقصد سے توجہ ہٹانے کا سبب نہیں بننا چاہیے۔
ایران کے پارلیمانی سربراہ محمد باقرقالیباف نے امریکی صدر ٹرمپ کے حالیہ بیان پر رد عمل کا اظہار کرتے ہوئے کہا کہ امریکہ کے دیگر ممالک کے ساتھ رویے کو دیکھتے ہوئے یہ واضح ہے کہ اس طرح کے بیانات محض دھوکہ دینے کے مترادف ہیں، جن کا مقصد ایران پر دباؤ ڈال کر اسے غیرمسلح کرنا ہے۔ انہوں نے واضح کیا کہ دھمکیوں کے سایے میں ہونے والے مذاکرات سے کوئی فائدہ نہیں ہو سکتا کیونکہ ایسے مذاکرات کے ذریعے پابندیاں ختم نہیں ہوں گی۔ اس طرح کے مذاکرات کا نتیجہ ایران کی عظیم قوم کی توہین کے سوا کچھ نہیں ہوگا۔
ایران کے پارلیمانی سربراہ محمد باقرقالیباف نے کہا کہ آج یہ حقیقت واضح ہو چکی ہے کہ ایران پہلے سے کہیں زیادہ مضبوط ہے لہذا ہم امریکہ کے کسی بھی پیغام کے انتظار میں نہیں بیٹھیں گے، بلکہ وسائل اور دیگر ممالک کے ساتھ تعلقات کو فروغ دے کر عالمی سطح پر اپنا مقام مزید مضبوط بنائیں گے جس کے نتیجے میں دشمن پابندیاں ختم کرنے پر مجبور ہوں گے۔
