عمان میں ہونے والے مذاکرات امریکا کی نیت ، ارادوں اور سنجیدگی کو جانچنے کی کسوٹی ہیں: اسماعیل بقائی
اسلامی جمہوریہ ایران نے کہا ہے کل عمان میں ہونے والے ایٹمی مذاکرات سے امریکا کی نیت اس کے ارادوں اور سنجیدگی کا پتہ چل جائے گا۔
سحرنیوز/ایران عمان کے دارالحکومت مسقط میں ایران اور امریکہ کے درمیان بالواسطہ مذاکرات کا پہلا دور شروع ہونے والا ہے، ایسے میں ایرانی وزارت خارجہ کے ترجمان نے سوشل میڈیا نیٹ ورک ایکس پر لکھا کہ ہفتہ کی بات چیت، امریکہ کے ارادوں اور سنجیدگی جانچنے کا موقع ہے۔ ایران کی وزارت خارجہ کے ترجمان اسماعیل بقائی نے کہا کہ ہم نیک نیتی اور پوری توجہ کے ساتھ سفارت کاری کا ایک حقیقی موقع فراہم کر رہے ہیں۔ امریکہ کو اس فیصلے کو سراہنا چاہیے، جو ان کی مخالفانہ بیان بازی کے باوجود کیا گیا۔ انہوں نے اپنی بات جاری رکھتے ہوئے کہا کہ ہم نہ قبل از وقت رائے دے رہے ہیں اور نہ ہی پیش گوئی۔ ہم ہفتے کے روز ہونے والی بات چیت کے مطابق سامنے والے فریق کے ارادوں اور سنجیدگی کا اندازہ لگانے کے بعد اپنے اگلے اقدامات طے کریں گے۔
ایرانی وزیر خارجہ سید عباس عراقچی نے گذشتہ ہفتے مسقط میں تہران اور واشنگٹن کے درمیان بالواسطہ مذاکرات دوبارہ شروع کرنے کا اعلان کرتے ہوئے ایکس نیٹ اکاؤنٹ پر لکھا کہ ایران اور امریکہ کے درمیان بالواسطہ مذاکرات ہفتہ (12 اپریل) کو عمان میں شروع ہوں گے۔ان کا کہنا تھا کہ مذاکرات صرف بالواسطہ ہوں گے اور مذاکرات کا ایجنڈا صرف ایٹمی معاملہ ہوگا اور ایران مخالف ظالمانہ امریکی پابندیوں کے خاتمے سے متعلق ہوگا ایرانی وزیرخارجہ نے کہا کہ یہ مذاکرات امریکا کے لئے ایک موقع بھی ہيں اور امتحان بھی ہیں۔ وزیر خارجہ نے مزید کہا کہ ایران اور امریکہ ہفتے کے روز عمان میں اعلیٰ سطحی حکام کی موجودگی میں بالواسطہ بات چیت کریں گے اور گیند امریکہ کی کورٹ میں ہے۔
