فلسطینی پناہ گزین کیمپوں پر صہیونی حکومت کی وحشیانہ بمباری، ایران کی شدید مذمت
May ۱۳, ۲۰۲۵ ۱۰:۳۷ Asia/Tehran
ایرانی وزارت خارجہ نے جبالیا اور خان یونس میں فلسطینی پناہ گزین کیمپوں پر بمباری پر صہیونی حکومت کی شدید مذمت کی ہے۔
سحرنیوز/ایران: ایران نے اسرائیل کی جانب سے جبالیہ اور خان یونس میں فلسطینی پناہ گزینوں کے عارضی کیمپوں اور خیموں پر کی گئی وحشیانہ بمباری کی شدید مذمت کی ہے۔ اس بمباری میں شیر خوار بچوں سمیت درجنوں بے گناہ فلسطینی شہید و زخمی ہوئے۔ ایرانی وزارت خارجہ کے ترجمان اسماعیل بقائی نے ان حملوں کو انسانیت کے خلاف سنگین جرم اور بین الاقوامی قوانین و اصولوں کی صریح خلاف ورزی قرار دیا۔
انہوں نے فلسطین کے مقبوضہ علاقوں میں اسرائیل کے مظالم کو انسانی حقوق کی پامالی اور بین الاقوامی قانون پر کھلی جارحیت سے تعبیر کیا۔ انہوں نے اس بات پر زور دیا کہ دنیا کی تمام حکومتیں اور اقوام متحدہ قانونی و اخلاقی طور پر فلسطینیوں کی نسل کشی روکنے اور انسانی حقوق کے اصولوں کے نفاذ کی پابند ہیں۔
ترجمان وزارت خارجہ نے عالمی عدالت انصاف میں اسرائیلی حکومت اور صیہونی حکام کے خلاف مقدمات کی پیروی کو تیز تر کرنے کی ضرورت پر زور دیا تاکہ جنگی جرائم، نسل کشی اور انسانیت کے خلاف جرائم پر انہیں انصاف کے کٹہرے میں لایا جاسکے۔
