ایران اور روس کے صدور کی ملاقات، باہمی تعاون میں فروغ پر زور
ایرانی صدر کے ساتھ ملاقات میں روسی صدر نے کہا کہ دونوں ممالک کے درمیان تعلقات انتہائی مثبت سمت میں آگے بڑھ رہے ہیں
سحرنیوز/ایران: ایران پریس کے مطابق ایران کے صدر مسعودپزشکیان اور روس کے صدر ولادیمیر پوتین نے ترکمانستان کے دارالحکومت عشق آباد میں امن اور اعتماد کے بین الاقوامی سربراہی اجلاس کے موقع پر ملاقات اور گفتگو کی۔
روس کے صدر ولادیمیر پوتین نے اس ملاقات میں کہا کہ تہران اور ماسکو حساس بین الاقوامی مسائل بشمول ایرانی ایٹمی مسئلے پر ایک دوسرے کے ساتھ قریبی رابطے میں ہیں اور ہم ایران کی حمایت کرتے ہیں۔
روس کے صدر نے گیس اور بجلی کے شعبوں میں ایران اور روس کے تعاون کا ذکر کرتے ہوئے کہا کہ دونوں فریق بوشہر جوہری پاور پلانٹ اور بنیادی ڈھانچے کی ترقی منجملہ شمال - جنوب کوریڈور سمیت مختلف دیگر شعبوں میں بھی تعاون کر رہے ہیں-
انہوں نے کہا دوہزار چوبیس میں دونوں ممالک کے درمیان تجارتی تبادلے میں تیرہ فیصد اضافہ ہوا جبکہ دوہزار پچیس کے پہلے نو مہینوں میں اس میں مزید پانچ فیصد اضافہ ہوا ہے-
روسی صدر نے ملاقات میں یہ بھی کہا کہ براہ کرم سپریم لیڈر کو گرمجوشی سے میرا سلام پہنچائیں -
صدر پزشکیان نے بھی پوتین کے ساتھ اپنی ملاقات میں کہا کہ ہم بین الاقوامی میدان میں ایران کے لیے روس کی حمایت کو سراہتے ہیں۔ ہم روس کے ساتھ جامع اسٹریٹجک پارٹنرشپ معاہدے کو نافذ کرنے کے لیے پرعزم ہیں۔
ہمیں فالو کریں:
Followus: Facebook, X, instagram, tiktok whatsapp channel
واضح رہے کہ اسلامی جمہوریہ ایران کے صدر مسعود پزشکیان جمعرات کی شام ، بین الاقوامی امن و اعتماد کے زیر عنوان بین الاقوامی اجلاس سے خطاب کے لئے ترکمانستان کے دارالحکومت عشق آباد پہنچے -
اس سربراہی اجلاس میں توانائی کی حفاظت، آبی سفارت کاری اور کثیر جہتی تعاون جیسے شعبوں پر توجہ مرکوز کی گئی اور اس میں کچھ ممالک کے صدور، اعلی عہدے داروں، اور اقوام متحدہ سمیت بین الاقوامی اداروں کے نمائندوں نے شرکت کی۔
