یمن نے اپنی نئی میزائل سے سب کو چونکایا، 11 منٹ اور 30 سیکنڈ میں دو ہزار کلومیٹر تک پہنچا
یمن کی مسلح افواج کے ترجمان نے اتوار کے روز تل ابیب کے خلاف فوج کے منفرد میزائل آپریشن کی تفصیلات کا اعلان کرتے ہوئے مزید کہا کہ یہ واقعہ صیہونی دشمن کی تاریخ میں پہلی بار پیش آیا ہے۔
سحر نیوز/ عالم اسلام: ہمارے نمائندے کی رپورٹ کے مطابق یمن کی مسلح افواج کے ترجمان یحییٰ سریع نے ایک بیان میں بتایا ہے کہ تل ابیب کے خلاف آج کا آپریشن ایک نئے ہائپر سونک بیلسٹک میزائل سے کیا گیا، یہ میزائل اپنے ہدف تک پہنچ گیا اور دشمن کا دفاعی نظام اسے روکنے اور اس کا مقابلہ کرنے میں ناکام رہا۔
یحییٰ سریع نے زور دیا کہ اس میزائل نے 2 ہزار 40 کلومیٹر کا فاصلہ 11 منٹ ، 30 سیکنڈ میں طے کیا جس کی وجہ سے صیہونیوں میں خوف و ہراس پھیل گیا، 20 لاکھ سے زائد صیہونی پناہ گاہوں کی طرف بھاگ گئے اور یہ واقعہ صیہونی دشمن کی تاریخ میں پہلی بار پیش آیا ہے۔
یمنی مسلح افواج کے ترجمان نے مزید کہا کہ یہ کارروائی پانچ مرحلے میں اور یمن کی مسلح افواج کی میزائل یونٹ کی وسیع کوششوں اور میزائل ٹکنالوجی کی توسیع کے تناظر میں کی گئی ہے تاکہ ہم صیہونی دشمن سے مقابلے کے چیلنجوں کا سامنا اور امریکہ و اسرائیل کی جانب سے بحری و بری رکاوٹوں کو عبور کرکے اپنے ٹارگیٹ کو نشانہ بنا سکیں۔
یحییٰ سریع نے مزید کہا: جغرافیائی رکاوٹیں، امریکی اور برطانوی جارحیت اور جاسوسی کا نظام یمن کو فلسطینی قوم کے دفاع کے اپنے مذہبی، انسانی اور اخلاقی فرض کو پورا کرنے سے نہیں روک سکے گا۔ "الاقصیٰ طوفان" آپریشن کی پہلی سالگرہ کے موقع پر صہیونی دشمن کو مستقبل میں مزید حملوں اور منفرد کارروائیوں کا انتظار کرنا چاہیے۔ اتوار کی صبح خبر رساں ذرائع نے بتایا کہ ایک میزائل تل ابیب کے قریب گرا اور اس کے بعد آگ بھڑک اٹھی۔
