یمن کے جوابی حملوں سے بوکھلایا امریکا، تل ابیب پر بھی ڈرون حملے
امریکہ اور صیہونی جارحیت کے جواب میں یمن کی مسلح افواج نے مقبوضہ علاقوں میں صہیونی تنصیبات اور بحیرہ احمر میں امریکی بحری بیڑے پر حملہ کیا ہے۔
سحر نیوز/ عالم اسلام: یمن کی مسلح فوج نے تل ابیب میں دو فوجی اہداف کو ڈرون حملے کے ذریعے نشانہ بنایا ہے۔ ترجمان میجر جنرل یحیی سریع نے ایک بیان میں کہا کہ حملے میں خودکش ڈرون طیاروں کو اسرائیل کے مرکزی علاقے میں دو فوجی اہداف کی طرف روانہ کیا گیا۔ یحییٰ سریع نے اس آپریشن کا مقصد فلسطینی عوام کی حمایت قرار دیا۔یمنی حملے کے بعد ابھی تک اسرائیلی فوج کی جانب سے اس پر کوئی ردعمل سامنے نہیں آیا ہے، اور نہ ہی حملے سے ہونے والے ممکنہ نقصانات یا جانی نقصان کے بارے میں کوئی رپورٹ سامنے آئی ہے۔
اس سے پہلے جنرل یحیی سریع نے امریکی بحریہ کے جہاز یو ایس ایس ہیری ٹرومن اور اس کے ہمراہ بحری جنگی جہازوں پر بھی میزائل اور ڈرون حملے کی خبر دی تھی، جس میں ان جہازوں کو بحیرہ احمر کے شمالی حصے میں نشانہ بنایا گیا۔ دوسری جانب یمن کے ٹی وی چینل المسیرہ نے اطلاع دی ہے کہ امریکہ نے یمن کے مغربی علاقے الحدیدہ میں دو فضائی حملے کیے ہیں۔
