پاکستان بنگلہ دیش تعلقات اہم پیش رفت کی طرف گامزن، بیس سال بعد دونوں ملکوں کے مشترکہ اقتصادی کمیشن کا اجلاس
پاکستان اور بنگلہ دیش کے تعلقات میں اہم پیش رفت ہو رہی ہے، دونوں ملکوں کے درمیان بیس سال کے بعد مشترکہ اقتصادی کمیشن کا اجلاس منعقد ہوگيا۔
سحرنیوز/پاکستان: پاکستانی ذرائع ابلاغ کی رپورٹ کے مطابق ڈھاکہ میں پاکستان اور بنگلہ دیش کے نویں مشترکہ اقتصادی کمیشن کا اجلاس منعقد ہوا۔ اجلاس کی مشترکہ صدارت پاکستان کے پٹرولیم وزیر علی پرویز ملک اور بنگلہ دیش کے مشیر برائے خزانہ ڈاکٹر صالح الدین احمد نے کی۔
رپورٹ کے مطابق اس اجلاس میں دونوں ممالک کے درمیان حلال ٹریڈ میں تعاون کی مفاہمتی یادداشت (ایم او یو) پر دستخط کیے گئے۔ پاکستان پیٹرولیم ڈویژن کی جانب سے جاری اعلامیے کے مطابق اس مفاہمتی یادداشت سے حلال مصنوعات کے معیار اور سرٹیفیکیشن میں تعاون بڑھانے کا راستہ ہموار ہو گا۔ یہ اجلاس بیس سال بعد منعقد ہوا ہے۔
اعلامیے میں بتایا گیا کہ پاکستان کی جانب سے بنگلہ دیش کو کراچی پورٹ ٹرسٹ کے استعمال کی پیش کش کی گئی، جس کے ذریعے بنگلہ دیش چین اور وسطی ایشیائی ممالک سمیت علاقائی ممالک کے ساتھ تجارت کر سکے گا۔
اعلامیے کے مطابق دونوں ممالک کے قومی شپنگ کارپوریشنوں کے درمیان تعاون بڑھانے کی اہمیت پر زور دیا گیا۔
اس موقع پر پاکستان کے پیٹرولیم وزیر علی پرویز ملک کا کہنا تھا کہ بنگلہ دیش کی مہمان نوازی پر شکر گزار ہیں، پاکستان اور بنگلہ دیش کے درمیان باہمی احترام اور دوستی پر مبنی ہے۔
پاکستان پیٹرولیم ڈویژن کی جانب سے جاری اعلامیے میں کہا گیا ہے کہ پاکستان اور بنگلہ دیش کے درمیان ڈائریکٹ فلائٹ شروع کرنے کے لیے کام تیز کرنے پر اتفاق کیا گیا اور پاکستان بنگلہ دیش نالج کوریڈور کے قیام پر زور دیا گیا۔ تجارت، سرمایہ کاری اور صنعت، توانائی، موسمیاتی تبدیلی اور اطلاعاتی ٹیکنالوجی میں تعاون پر بھی اتفاق کیا گیا ہے۔
اعلامیے کے مطابق نالج کوریڈور کے تحت بنگلہ دیشی طلبا کے لیے پاکستان میں 500 نئے اور مکمل مالی مدد پر مشتمل وظیفوں کی تجویز ہے اور طرح اسلام آباد نے پاکستان ٹیکنیکل اسسٹنس پروگرام کے تحت تربیتی سیٹوں کی تعداد 5 سے بڑھا کر 25 کر دی ہے۔
