امریکہ گرین لینڈ پر قبضہ کرنے کے لئے جلدی کرے، اس سے پہلے کہ ریفرینڈم کے ذریعہ گرین لینڈ کا الحاق روس سے ہوجائے: روس

Jan ۱۴, ۲۰۲۶ ۱۴:۰۲ Asia/Tehran

روس کی سلامتی کونسل کے نائب سربراہ اور سابق روسی صدر دیمتری میدویدیف نے گرین لینڈ کو امریکہ سے ملحق کرنے کے صدر ٹرمپ کی کوششوں کی طرف اشارہ کرتے ہوئے ٹرمپ انتظامیہ کو مشورہ دیا ہے کہ یہ کام جلد انجام دے کیونکہ ممکن ہے ریفرینڈم کے ذریعہ گرین لینڈ کا الحاق روس سے ہوجائے۔

سحرنیوز/دنیا: ارنا کی رپورٹ کے مطابق دیمتری میدویدیف نے روسی سوشل نیٹ ورک پلیٹ فارم "میکس" پر اپنی پوسٹ میں طنزیہ انداز میں لکھا ہے کہ "گرین لینڈ پر امریکی قبضہ دنیا کی آب و ہوا میں بہتری کے لئے مفید ہوگا۔"

روس کی سلامتی کونسل کے نائب سربراہ اور سابق صدر دیمتری میدویدیف نے کہا کہ ٹرمپ کو جلدی کرنی چاہئے، غیر مصدقہ خبروں کے مطابق ممکن ہے کہ آئندہ چند دن میں اچانک ریفرینڈم ہوجائے اور گرین لینڈ کے لوگ روس سے الحاق کے حق میں ووٹ دے دیں۔

قابل ذکر ہے کہ امریکی صدر ڈونلڈ ٹرمپ نے ابھی حال ہی میں گرین لینڈ کے بارے میں پوچھے گئے سوالوں کے جواب میں کہا تھا کہ "اگر ہم نے گرین لینڈ کو نہیں لیا تو روس یا چین اس پر قبضہ کر لیں گے لیکن جب تک میں صدر ہوں ایسا نہیں ہوگا، فوجی موجودگی کافی نہیں ہے بلکہ ملکیت ہمارے پاس ہونی چاہئے۔"

ہمیں فالو کریں:

ڈونلڈ ٹرمپ نے اس سوال کے جواب میں کہ "کیا گرین لینڈ پر قبضے کی کوشش سے نیٹو کے رکن ممالک کو نقصان نہیں پہنچے گا؟ کہا کہ "انہیں ہم سے زیادہ ہماری ضرورت ہے۔"