سعودی عرب میں ہوئے غم ناک حادثے پر ہندوستانی وزیر اعظم اور حزب اختلاف کانگریس نے کیا رنج و غم کا اظہار
سعودی عرب میں پیش آئے دردناک سڑک حادثہ میں جاں بحق ہونے والے ہندوستانی عمرہ زائرین کی تعداد 45 تک پہنچ گئی ہے۔ پہلے 42 ہندوستانی عمرہ زائرین کے جاں بحق ہونے سے متعلق خبریں سامنے آئی تھیں، لیکن اب 45 اموات کی تصدیق ہو گئی ہے۔ بس میں سوار 46 عمرہ زائرین میں سے صرف ایک کی جان بچی ہے، جس کا علاج اسپتال میں چل رہا ہے۔
سحرنیوز/ہندوستان: موصولہ اطلاعات کے مطابق، اس غمناک حادثہ پر ہندوستانی وزیر اعظم نریندر مودی نے شدید رنج و غم کا اظہار کیا ہے۔ انھوں نے سوشل میڈیا پلیٹ فارم ’ایکس‘ پر جاری کردہ ایک پوسٹ میں لکھا ہے کہ ’’مدینہ میں ہندوستانی شہریوں کے ساتھ ہوئے حادثہ سے بے حد غمزدہ ہوں۔ متاثرہ کنبوں کے تئیں میری ہمدردی ہے۔‘‘ وہ مزید لکھتے ہیں کہ ’’میں حادثہ میں زخمی افراد کے جلد ٹھیک ہونے کی دعا کرتا ہوں۔ ریاض میں واقع ہمارا سفارت خانہ اور جدہ میں قونصل خانہ ہر ممکن مدد مہیا کرا رہے ہیں۔ ہمارے افسران بھی سعودی عرب حکومت کے افسران سے رابطے میں ہیں۔‘‘
اس حادثہ پر کانگریس نے بھی اپنے شدید افسوس کا اظہار کیا ہے۔ کانگریس نے ’ایکس‘ ہینڈل پر لکھا ہے کہ ’’سعودی عرب میں مدینہ کے قریب پیش آنے والے اندوہناک واقعہ پر دلی افسوس ہے، جس میں متعدد ہندوستانی شہریوں کی جانیں چلی گئی ہیں۔‘‘ پارٹی مزید لکھتی ہے کہ ’’ہم غمزدہ خاندانوں سے اپنی گہری تعزیت کا اظہار کرتے ہیں اور اس مشکل وقت میں ان کے ساتھ کھڑے ہیں۔‘‘ ساتھ ہی لکھا ہے کہ ’’ہم حکومتِ ہند سے اپیل کرتے ہیں کہ تمام ضروری امداد فراہم کی جائے۔ زخمیوں کی جلد اور مکمل صحت یابی کے لیے ہماری دعائیں شامل ہیں۔‘‘
واضح رہے کہ مہلوکین میں بیشتر حیدر آباد کے باشندے شامل ہیں۔ یہ حادثہ اس وقت ہوا جب عمرہ کے لیے گئے لوگوں کو لے کر جا رہی ایک بس اچانک ڈیزل ٹینکر سے ٹکرا گئی۔ ’گلف نیوز‘ کی رپورٹس کے مطابق عمرہ زائرین کو لے کر بس مکہ سے مدینہ جا رہی تھی، اچانک وہ راستے میں ڈیزل ٹینکر سے ٹکرا گئی۔ حادثہ مقامی وقت کے مطابق اتوار کی رات تقریباً 1.30 بجے مہراس یا مفریحات علاقہ میں پیش آیا، جو مدینہ کے قریب ہے۔ حادثہ کے وقت کئی عمرہ زائرین نیند کی آغوش میں تھے۔ ٹکر لگتے ہی بس آگ کی لپٹوں میں پھنس گئی اور لوگوں کو بچنے کا بھی وقت نہیں ملا۔ حادثہ اتنا خوفناک تھا کہ مہلوکین کی شناخت کرنا بھی مشکل ہے۔
