عالمی برادری فلسطینی عوام کی نسل کشی کے خاتمے کے لئے اسرائیل پر دباؤ ڈالے: اسماعیل بقائی
ایرانی وزارت خارجہ کے ترجمان نے غزہ میں قابض صہیونی حکومت کے بڑھتے ہوئے جرائم کی شدید مذمت کرتے ہوئے عالمی برادری کی خاموشی پر افسوس کا اظہار کیا ہے۔
سحرنیوز/ایران: ایرانی وزارت خارجہ کے ترجمان اسماعیل بقائی نے غزہ اور مغربی کنارے میں اسرائیلی حملوں، عید الفطر کے دوران صحافیوں کے منظم قتل اور مسجد الاقصی پر صہیونی انتہا پسندوں کے حملوں کی سخت الفاظ میں مذمت کی ہے۔ انہوں نے اقوام متحدہ کی انسانی حقوق کونسل کی رپورٹ کا حوالہ دیتے ہوئے کہا کہ عالمی برادری کو اسرائیل پر دباؤ ڈالنا چاہیے تاکہ وہ قحط اور بھوک کے ذریعے فلسطینی عوام کی نسل کشی کی اپنی پالیسی ختم کرے۔ اسماعیل قائی نے مغربی ممالک کی منافقانہ پالیسیوں پر افسوس کا اظہار کرتے ہوئے کہا کہ ان ممالک کی جانب سے فلسطین میں انسانی حقوق کی سنگین اور منظم خلاف ورزیوں پر خاموشی ان کی دوغلی پالیسی اور قانون کی حکمرانی کے دعووں کی کھلی نفی ہے۔انہوں نے زور دیا کہ تمام ممالک، خصوصا مسلم دنیا فلسطینی عوام کے ساتھ نہ صرف زبانی یکجہتی کا اظہار کریں بلکہ عملی اقدامات بھی کریں تاکہ غزہ میں خواتین اور بچوں کے بے رحمانہ قتل عام کو روکا جاسکے۔
