ایران کے دشمنوں کو دوٹوک پیغام: جارحیت کی صورت میں سخت نتائج کا سامنا ہوگا
ایران کی مسلح افواج کے خاتم الانبیاء (ص) ہیڈکوارٹرز کے ترجمان، کرنل ابراہیم ذوالفقاری نے ایک سخت بیان جاری کرتے ہوئے کہا ہے کہ دشمن امریکہ اور اسرائیل کو یہ سمجھنا ہوگا کہ ایران کی باخبر اور مزاحم قوم اور اس کے مسلح افواج کسی بھی جارحیت کا بھرپور جواب دینے کے لیے تیار ہیں۔
سحرنیوز/ایران: کرنل ذوالفقاری نے، اپنے بیان میں جو منگل (31 مارچ 2026) کو جاری کیا گیا کہا کہ امریکی صدر اور اسرائیلی غاصب حکمرانوں کے غلط اندازے کی وجہ سے وہ ایران کی بہادر قوم اور مسلح افواج کو دنیاوی پیمانوں سے ناپنے کی کوشش کر رہے ہیں۔
انہوں نے مزید کہا کہ دشمن کی یہ غلط فہمی ایران کے عوام کی شاہراہوں اور مرکزی اسکوائرز پر غیر معمولی موجودگی اور مسلح افواج کی میدان جنگ میں معجزاتی مزاحمت کو ان کے لیے ناقابل پیشین گوئی بنا دیتی ہے۔
ترجمان نے اس بات پر زور دیا کہ دشمن کی یہ اسٹریٹجک غلطی انہیں ذلت اور تباہی کی طرف لے جا رہی ہے۔ وہ یہ سمجھتے ہیں کہ پروپیگنڈا جنگ، اپنے نام نہاد جدید فوجی سازوسامان کی نمائش، اور معصوم بچوں، خواتین، مردوں، سائنسدانوں اور بہادر کمانڈروں کے بہیمانہ قتل سے وہ ایران کو جھکنے پر مجبور کر دیں گے۔ انہوں نے کہا کہ ایران کی تاریخ گواہ ہے کہ یہ ملک کبھی دشمنوں کے سامنے نہیں جھکا۔ دشمنوں کے یہ خام خیالی ہے کہ وہ آبنائے ہرمز پر قابض ہو سکیں گے، یہ آرزو وہ ہمیشہ کے لیے اپنے دل میں دفن کر لیں گے۔
کرنل ذوالفقاری نے آخر میں دہرایا کہ شکست خوردہ امریکی-صیہونی دشمنوں کو جان لینا چاہیے کہ ایران کی ہوشیار اور مزاحم قوم اور ان کے مسلح افواج کے بہادر فرزند یہ ثابت کر چکے ہیں کہ وہ جارح دشمن کو نیست و نابود کر کے اسے ذلت و رسوائی سے دوچار کر دیں گے۔
ہمیں فالو کریں:
Follow us: Facebook, X, instagram, tiktok whatsapp channel
