ہم نے بن گورین ایئرپورٹ اور ہیری ٹرومین طیارہ بردار جہاز کو اپنے حملوں کا نشانہ بنایا ہے: جنرل یحیی سریع
یمن کی مسلح افواج کے ترجمان جنرل یحیی سریع نے کہا ہے کہ گزشتہ رات تل ابیب کے بن گورین ایئرپورٹ اور امریکہ کے ہیری ٹرومین طیارہ بردار جہاز کو نشانہ بنایا گیا۔
سحر نیوز/ عالم اسلام: جنرل یحیی سریع نے ایک باضابطہ بیان جاری کیا جس میں بتایا گیا ہے کہ یمن کی مسلح افواج نے ذوالفقار اور ہائپرسونک نوعیت کے "فلسطین 2" میزائلوں کے ذریعے مقبوضہ یافا ( تل ابیب) میں واقع بن گورین بین الاقوامی ایئرپورٹ کو مکمل کامیابی کے ساتھ نشانہ بنایا ہے۔ جنرل یحیی سریع نے بتایا کہ گزشتہ چوبیس گھنٹے کے دوران بحیرہ احمر میں موجود امریکی بحری بیڑے پر بھی میزائل داغے گئے۔ انہوں نے کہا کہ امریکی جنگی جہازوں کو نشانہ بنانے کا سلسلہ کئی گھنٹوں تک جاری رہا جس کے نتیجے میں یمن پر فضائی جارحیت کو ناکام بنا دیا گیا۔ یمن کی مسلح افواج کے ترجمان نے زور دیکر کہا کہ غزہ پر جارحیت اور جنگ بندی کی خلاف ورزی کے خاتمے تک صیہونی حکومت سے وابستہ بحری جہازوں پر پابندی، انہیں نشانہ بنانے اور مقبوضہ سر زمینوں پر ڈرون اور میزائل سے حملوں کا سلسلہ جاری رہے گا۔
