ہندوستان: چین کے ثالثی کے دعوے تشویشناک، نریندر مودی وضاحت پیش کریں، کانگریس

Dec ۳۱, ۲۰۲۵ ۱۷:۳۹ Asia/Tehran

ہندوستان کی کانگریس پارٹی نے آپریشن سندور پر ٹرمپ کے بعد اب چین کے بھی ثالثی دعووں کو تشویشناک قرار دیتے ہوئے نریندر مودی سے اس مسئلے پر باضابطہ ردعمل کا مطالبہ کیا ہے۔

سحرنیوز/ہندوستان: کانگریس کے سینئر رہنما جے رام رمیش نے ایکس پر جاری بیان میں آپریشن سندور پر ٹرمپ اور چین کے ثالثی دعووں کو تشویشناک قرار دیتے ہوئے وزیر اعظم نریندر مودی سے وضاحت طلب کی ہے اور کہا ہے کہ قومی سلامتی جیسے معاملے پر عوام کو سچ جاننے کا حق ہے۔ کانگریسی سینئر رہنما نے آپریشن سندور کو اچانک روکنے سے متعلق بین الاقوامی دعووں پر شدید تشویش کا اظہار کرتے ہوئے وزیر اعظم نریندر مودی سے وضاحت طلب کی ہے۔

ان کا کہنا ہے کہ امریکی صدر ڈونلڈ ٹرمپ طویل عرصے سے مختلف فورموں پر کم از کم پینسٹھ مرتبہ اور سات ممالک میں یہ دعویٰٰ دہرا چکے ہیں کہ انہوں نے دس مئی دو ہزار پچیس کو ذاتی مداخلت کے ذریعے آپریشن سندور رکوادیا مگر اس پر وزیر اعظم کی جانب سے اب تک کوئی باضابطہ ردعمل سامنے نہیں آیا ہے۔

ہمیں فالو کریں:

انہوں نے کہا کہ اب چین کے وزیر خارجہ کی جانب سے بھی ثالثی کا دعویٰٰ سامنے آیا ہے جو صورت حال کو مزید پیچیدہ بنا دیتا ہے۔ ان کے بقول ایسے حالات میں جب چین ، پاکستان کے ساتھ واضح طور پر ہم آہنگ دکھائی دیتا ہے، ہندوستان اور پاکستان کے درمیان چینی ثالثی کا دعویٰٰ نہایت تشویشناک ہے۔