غزہ میں شدید سردی کے باعث شہید ہونے والے بچوں کی تعداد 10 ہوگئی

Jan ۲۴, ۲۰۲۶ ۱۸:۲۴ Asia/Tehran

غزہ کی وزارت صحت کے مطابق علاقے میں شدید سردی کے باعث شہید ہونے والے معصوم بچوں کی تعداد میں اضافہ ہوا ہے اور اب یہ تعداد 10 ہوگئی ہے۔

سحرنیوز/عالم اسلام: ارنا کی رپورٹ کے مطابق غزہ پٹی میں جنگ و محاصرے کے نتائج اور انسانی بحران جاری رہنے کے دوران غزہ کی وزارت صحت نے شدید سردی کے دوران معصوم بچوں کی اموات میں اضافے کی خبر دی ہے اور کہا ہے کہ یہ صورت حال جنگ بندی معاہدے پر غاصب اسرائیلی حکومت کے عمل نہ کرنے کی بنا پر پیدا ہوئی ہے۔

رپورٹ کے مطابق غزہ کی وزارت صحت نے بتایا کہ موسم سرما شروع ہونے کے بعد سے اب تک شدید سردی کے باعث شہید ہونے والے بچوں کی تعداد 10 تک پہنچ گئی ہے۔

مذکورہ وزارت نے ایک بیان میں کہا کہ تین مہینے کا ایک بچہ شہدائے الاقصیٰ اسپتال میں شدید ٹھنڈ کے نتیجے میں موت کی آغوش میں چلا گیا جس کے بعد موسم سرما کے آغاز سے اب تک چھوٹے چھوٹے 10 بچے شہید ہوچکے ہیں۔

ہمیں فالو کریں:

رپورٹ کے مطابق غاصب اسرائیلی فوج کی وحشیانہ جارحیت کے نتیجے میں گھروں اور بنیادی تنصیبات کی وسیع تباہی کی وجہ سے بیس لاکھ سے زیادہ فلسطینی انتہائی سخت حالات میں زندگی گزار رہے ہیں اور ان میں سے لاکھوں فلسطینی ایسے خیموں میں زندگی گزارنے پر مجبور ہیں جن میں ضروری اور سردی اور بارش وغیرہ سے بچنے کے لئے کم ترین وسائل بھی دستیاب نہیں ہیں۔